عائشہ احد کو مبینہ دھمکیاں دینے پر حمزہ شہباز سپریم کورٹ طلب

لاہور: مسلم لیگ (ن) کے رہنما حمزہ شہباز شریف کی بیوی ہونے کی دعویدار عائشہ احد ملک نے الزام عائد کیا ہے کہ  انہیں اور ان کی بیٹی کو حمزہ شہباز سے خطرہ ہے۔

ایکسپریس نیوزکے مطابق چیف جسٹس ثاقب نثار کی سربراہی میں دو رکنی بنچ نے حمزہ  شہباز کی بیوی ہونے کی دعویدارعائشہ احد کو دھمکیاں ملنے کے معاملے کی سماعت کی۔

عائشہ احد نے مؤقف اختیار کیا کہ اسے اور اس کی بیٹی کو حمزہ شہباز سے جان کا خطرہ ہے۔ چیف جسٹس نے حمزہ شہباز کو طلب کرتے ہوئے  ایڈووکیٹ جنرل پنجاب کو ہدایت کی کہ وہ شہباز شریف کو فون کر کے حمزہ شہباز کی پیشی کو یقینی بنائیں۔ کسی کی جان خطرہ میں نہیں دیکھ سکتے۔

چیف جسٹس نے ریمارکس دیئے کہ آئی جی صاحب میرے حکم پر گھبرا کیوں جاتے ہیں،  چیف جسٹس پاکستان نے کمرہ عدالت میں موجود خواجہ سلمان  سے  استفسار کیا کہ بتائیں حمزہ شہباز کہاں ہے۔ خواجہ سلمان نے بتایا کہ ان کے علم میں نہیں۔ چیف جسٹس نے کہا کہ سارا دن حمزہ کے ساتھ گھومتے ہیں اور کہتے ہیں کہ پتہ نہیں۔ حمزہ شہباز جہاں کہیں بھی ہوں پیش ہوں۔

ایڈووکیٹ جنرل پنجاب نے عدالت کو آگاہ کیا کہ حمزہ شہباز بیرون ملک ہیں ، 3 سے 4 روز میں واپس پاکستان آ جائیں گے۔ عدالت نے آئی جی پنجاب کو حکم دیا کہ عائشہ احد کو تحفظ فراہم کیا جائے۔ عدالت نے عائشہ احد کے خلاف مقدمات کا ریکارڈ بھی 6 جون تک پیش کرنے کا حکم دے دیا۔

چیف جسٹس نے عائشہ احد پر تشدد کے حوالے سے مقدمہ درج کرنے کے عدالتی فیصلے پر عمل درآمد نہ کرنے پر برہمی کا اظہار کیا اور حکم دیا کہ درخواست میں نامزد ملزمان کے خلاف آج ہی مقدمہ درج کیا جائے۔ عائشہ احد پر تشدد سے متعلق درخواست میں حمزہ شہباز، رانا مقبول، علی عمران اور دیگر کو فریق بنایا گیا ہے۔ عدالت نے کہا کہ آج تک مقدمہ درج نہ کرنے والے پولیس اہلکاروں میں کون کون شامل ہیں، عدالت کو آگاہ کیا جائے۔ عدالت نے کیس کی سماعت 29  جون تک ملتوی کر دی۔

The post عائشہ احد کو مبینہ دھمکیاں دینے پر حمزہ شہباز سپریم کورٹ طلب appeared first on ایکسپریس اردو.

from ایکسپریس اردو https://ift.tt/2xDL1Gc
via IFTTT