اسلام آباد: وزیراعظم عمران خان کا کہنا ہے کہ قیام پاکستان سے لے کر ہمارے حکمران طبقے نے غریب کے پیسے پر عیاشی کی گورے کی روایت کواپنایا۔
اسلام آباد میں سرکاری ملازمین سے خطاب کرتے ہوئے وزیراعظم عمران خان کا کہنا تھا کہ ہمیں خود کو بدلنا ہے، اگر ہم نے خود کو تبدیل نہ کیا تو اللہ ہمارے حالات کو تبدیل نہیں کرے گا، قیام پاکستان سے لے کر آج تک غلامی کی سوچ سے نہیں نکل سکے، ہم نے آج تک پاکستان میں انگریزوں کے نظام کو ہی تبدیل نہیں کیا، گورے نے ہندوستان کے پیسوں سے شاہانہ طرز زندگی اپنایا تھا اور ہمارے حکمران طبقے نے بھی گوروں کی روایات کو اپناتے ہوئے غریب کے پیسے پرعیاشی کی۔
عمران خان کا کہنا تھا کہ پاکستان میں جس طرح خرچہ ایک حکمران طبقہ کر رہا ہے دنیا میں کہیں اور نہیں ہوتا، ہم نے ایسے ایسے منصوبے شروع کررکھے ہیں جن کے لئے قرضے لینے پڑے، اورنج اور میٹرو ٹرین منصوبوں پر قرضے لے کر اس پر سود بھی دے رہے ہیں، پاکستان پر 30 ہزار ارب کا قرضہ ہے اور ہم قرضوں کی مد میں ہر روز 6 ارب روپے سود ادا کر رہے ہیں۔
وزیراعظم نے کہا کہ پاکستان کو کبھی اتنے چیلنجز نہیں تھے جو آج ہیں، لیکن میرا ایمان ہے کہ دنیا میں کوئی چیز ناممکن نہیں، ناممکن کو ممکن بنانے کے لیے انسان کو خود کو بدلنا پڑتا ہے، ہمیں انگریز کے دور کی سوچ کو تبدیل کرنا ہے، مجھے پوری دنیا نے ساری زندگی ہر موقع پر کہا کہ تم کامیاب نہیں ہوسکتے لیکن میں نے سب کردکھایا۔
عمران خان کا مزید کہنا تھا کہ سارا مسئلہ کرپشن کا ہے، اداروں میں بڑی سطح کی کرپشن ہے، تیسری دنیا کے ممالک اس لیے غریب ہیں کیوں کہ وہاں کرپشن ہے، غلطیوں سے کوئی شخص پاک نہیں، مجھ سے بھی غلطیاں ہوئیں، بیورو کریٹس سے بھی ہوسکتی ہیں لیکن میں آپ کو یقین دلاتا ہوں آپ ایک موقع لیں میں آپ کے ساتھ کھڑا ہوں، بیوروکریسی کو سیاسی مداخلت سے پاک کریں گے، کسی قسم کی سیاسی مداخلت نہیں ہوگی۔ بیوروکریٹ جب تک کام نہیں کریں گے ہمارا ریفارم پروگرام رہ جائے گا، جب تک سرکاری افسران پالیسی پرعملدرآمد نہیں کرائیں گے ہم کامیاب نہیں ہوسکتے۔
The post حکمران طبقے نے غریب کے پیسے پر عیاشی کی اور گورے کی روایت کواپنایا، عمران خان appeared first on ایکسپریس اردو.
from ایکسپریس اردو https://ift.tt/2Olnkq7
via IFTTT
via Blogger https://ift.tt/2OmdvZ0
September 14, 2018 at 12:55PM
0 Comments