سپریم کورٹ کا علیمہ خان کو 2 کروڑ 94 لاکھ روپے جمع کرانے کا حکم

 اسلام آباد: سپریم کورٹ نے بیرون ملک جائیداد کیس میں وزیراعظم عمران خان کی ہمشیرہ علیمہ خان کو 29.4 ملین روپے جمع کرانے کا حکم دیا ہے۔

سپریم کورٹ میں بیرون ملک اکاؤنٹس اور جائیدادوں سے متعلق کیس کی سماعت ہوئی تو علیمہ خان اور ان کے وکیل سلمان اکرم راجہ عدالت میں پیش ہوئے۔ چیف جسٹس نے استفسار کیا کہ آپ نے دبئی میں کتنے کی پراپرٹی خریدی اور اس کیلئے بینک سے کتنا قرض لیا؟۔ علیمہ خان نے جواب دیا کہ 2008 میں 3 لاکھ 75 ہزار ڈالر میں جائیداد خریدی، جس کے لیے 50 فیصد بنک قرض لیا اور 50 فیصد رقم خود دی، یہ جائیداد گزشتہ سال فروخت کردی ہے۔ وکیل سلمان اکرم راجہ نے کہا کہ ایف بی آر میں علیمہ خان کے ذمے 18 ملین (ایک کروڑ 80 لاکھ) کی رقم ہے۔

یہ بھی پڑھیں: عمران خان نے اپنی ہمشیرہ علیمہ خان کو این آر او دیا، شہباز شریف

سپریم کورٹ نے علیمہ خان کو ایک ہفتے میں 29.4 ملین (2 کروڑ 94 لاکھ) روپے جمع کرانے کا حکم دے دیا۔ عدالت نے قرار دیا کہ علیمہ خان چاہیں تو ایف بی آر حکام کے خلاف قانونی چارہ جوئی کرسکتی ہیں۔

گزشتہ سماعت پر ایف بی آر کے کمشنر ان لینڈ ریونیو ڈاکٹر اشتیاق نے بتایا تھا کہ علیمہ خان نے بینک سے قرض لے کر دبئی میں فلیٹ خریدا تھا، اس کا کرایہ قسط کے طور پر بینک کو ادا کیا، پھر فلیٹ کو فروخت کر دیا، انہوں نے یہ جائیداد ظاہر نہیں کی تھی جس پر ایف بی آر نے انہیں نوٹس دیا تھا۔

یہ بھی پڑھیں: علیمہ خان کے خلاف ایف بی آر کارروائی کو ریکارڈ کا حصہ بنانے کا حکم

اس سے قبل ایف آئی اے نے پاکستانیوں کے غیرملکی اثاثوں سے متعلق رپورٹ سپریم کورٹ میں جمع کرائی تھی جس میں بتایا گیا تھا کہ علیمہ خان بھی دبئی میں بے نامی جائیداد کی مالک ہیں۔

The post سپریم کورٹ کا علیمہ خان کو 2 کروڑ 94 لاکھ روپے جمع کرانے کا حکم appeared first on ایکسپریس اردو.

from ایکسپریس اردو https://ift.tt/2EfleFM
via IFTTT