بھارتی جیل میں مشتعل ہندو انتہاپسندوں کے ہاتھوں پاکستانی قیدی قتل

جے پور: بھارتی جیل میں پلوامہ حملے کا بہانہ بنا کر مشتعل ہندو انتہا پسندوں نے پتھر مار مار کر شاکر اللہ نامی پاکستانی قیدی کو قتل کردیا۔

بین الاقوامی خبر رساں ادارے کے مطابق بھارتی ریاست راجستھان کے شہر جے پور کی جیل میں مشتعل ہندو قیدیوں نے پاکستانی قیدی شاکر اللہ کو پتھر مار کر قتل کردیا۔ بھارتی قیدیوں کے مشتعل ہجوم نے پاکستان کے خلاف نعرے بازی بھی کی۔

واقعے کی اطلاع ملتے ہی اعلیٰ پولیس حکام جیل پہنچ گئے اور دو حملہ آور ہندو قیدیوں کو اپنی تحویل میں لے لیا۔ پاکستانی قیدی کی شناخت تاحال ظاہر نہیں کی گئی ہے۔ مشتعل ہندو قیدیوں نے پلوامہ حملے کے ردعمل میں پاکستانی قیدی کو ہلاک کیا۔

رواں ماہ کی 14 تاریخ کو مقبوضہ کشمیر میں خود کش حملے میں 44 بھارتی فوجیوں کی ہلاکت کے بعد بھارت نے بغیر کسی ثبوت کے حملے کا الزام پاکستان پر دھر دیا تھا جب کہ بھارتی میڈیا بھی مسلسل شہریوں کو اشتعال انگیزی پر اکسا رہا ہے۔

واضح رہے کہ بھارت کی مختلف جیلوں میں 400 سے زائد پاکستانی قید ہیں جن میں اکثریت ماہی گیروں اور غلطی سے سرحد پارکرنے والوں کی ہے جب کہ کچھ سفری دستاویزات گم ہوجانے یا معیاد سے زیادہ دن مقیم رہنے کے جرم میں قید ہیں۔

The post بھارتی جیل میں مشتعل ہندو انتہاپسندوں کے ہاتھوں پاکستانی قیدی قتل appeared first on ایکسپریس اردو.

from ایکسپریس اردو https://ift.tt/2XdjofS
via IFTTT