کراچی: سپریم کورٹ نے کراچی سے تمام آئل ٹینکرز شہر سے باہر ذوالفقار آباد منتقل کرنے کیلئے 15 دن کی مہلت کردی۔

سپریم کورٹ کراچی رجسٹری میں شیریں جناح کالونی میں آئل ٹینکرز کھڑے کرنے کے کیس کی سماعت ہوئی۔ آئل ٹینکرز شہر میں داخل ہونے پر عدالت نے برہمی کا اظہار کیا۔ کراچی میٹروپولیٹن کارپوریشن (کے ایم سی) کے وکیل نے کہا کہ کراچی سے باہر ذوالفقار آباد آئل ٹرمینل مکمل بن چکا ہے، مگر آئل ٹینکرز مالکان ذوالفقارآباد جانے کو تیار نہیں اور ہڑتال کردیتے ہیں۔

یہ بھی پڑھیں: آئل ٹینکرز کو ذوالفقار آباد ٹرمینل منتقل کرنے کا حکم

جسٹس گلزار احمد نے کہا کہ انہیں پولیس کے ذریعے اٹھا کر شہر سے باہر پھینکیں، کیا حکومت کے پاس طاقت نہیں، اگر یہ کام نہیں کرنا چاہتے اور ہڑتال کرتے ہیں تو آئل کمپنیاں انہیں آئل دینا بند کردیں، شہر میں ایک آئل ٹینکر داخل نہیں ہونے دیں گے، اب ہمارے پاس چین کا آپشن موجود ہے، حکومت پاکستان کو کہتے ہیں کہ آئل ٹینکرز کے لیے چین سے بات کرے، یہ کام نہیں کرتے نہ کریں، چین اب ہمارا آپشن موجود ہے، اب ہر چیز چین کو دو یہی آپشن ہے، حکومت کو چین سے آئل ٹینکرز کے ٹھیکے کی ہدایت کردیتے ہیں۔

یہ بھی پڑھیں: ذوالفقار آباد ٹرمینل میں 2375 آئل ٹینکر پارک کرنے کی سہولت فراہم

آل پاکستان آئل ٹینکرز اونر ایسوسی ایشن کے چیئرمین یوسف شاھوانی نے کہا کہ ہم ذوالفقار آباد جانے کے لیے تیار ہیں۔ عدالت نے حکم دیا کہ آپ ایک ہفتے میں خود ذوالفقار آباد منتقل ہوجائیں، خود نہ گئے تو 15 دن بعد پولیس اور رینجرز کے ذریعے شہر سے نکالیں گے۔ عدالت نے 15 روز میں تمام آئل ٹینکرز ذوالفقار آباد منتقل کرنے کی ہدایت کردی۔

The post کراچی سے تمام آئل ٹینکرز ذوالفقار آباد منتقل کرنے کیلئے 15 دن کی مہلت appeared first on ایکسپریس اردو.



from ایکسپریس اردو https://ift.tt/2HzSx5f
via IFTTT