سعودی ولی عہد سے آرمی چیف کی ملاقات، دفاعی تعاون کے فروغ پر اتفاق

 اسلام آباد: سعودی ولی عہد شہزادہ محمد بن سلمان سے آرمی چیف جنرل قمر جاوید باجوہ نے ملاقات کی۔

سعودی ولی عہد شہزادہ محمد بن سلمان سے آرمی چیف جنرل قمر جاوید باجوہ نے وزیراعظم ہاؤس میں ملاقات کی۔ دونوں شخصیات نے پاک سعودی دفاعی تعاون سمیت خطے کی صورتحال پر گفتگو کی جبکہ افغان طالبان سے ہونے والے امن مذاکرات پر بھی بات چیت کی گئی۔ اس موقع پر ڈی جی آئی ایس پی آر میجر جنرل آصف غفور بھی موجود تھے۔

شہزادہ محمد بن سلمان نے پاکستان کی مسلح افواج کی پیشہ وارانہ صلاحیتوں کو سراہا اور دونوں ممالک میں دفاعی و فوجی تعاون کو مزید مستحکم کرنے پر اتفاق کیا۔ ملاقات میں سعودی شاہی خاندان کی اہم شخصیات بھی شریک تھیں۔

پھر شہزادہ محمد بن سلمان سے چیئرمین سینیٹ صادق سنجرانی کی سربراہی میں 11 رکنی پارلیمانی وفد نے ملاقات کی جس میں اسپیکر قومی اسمبلی اسد قیصر اور ڈپٹی اسپیکر قاسم سوری بھی شامل تھے۔

اس کے بعد سعودی ولی عہد شہزادہ محمد بن سلمان ایوان صدر پہنچے جہاں ان کے اعزاز میں پروقار تقریب کا انعقاد ہوا۔ سعودی ولی عہد نے صدر ڈاکٹر عارف علوی سے ملاقات کی۔

ایوان صدر میں ہونے والی تقریب میں صدر مملکت عارف علوی سعودی ولی عہد کو ملک کا اعلیٰ ترین سول اعزاز ’نشان پاکستان‘ عطا کریں گے جبکہ دونوں رہنما خطاب بھی کریں گے۔

The post سعودی ولی عہد سے آرمی چیف کی ملاقات، دفاعی تعاون کے فروغ پر اتفاق appeared first on ایکسپریس اردو.

from ایکسپریس اردو https://www.express.pk/story/1557396/1
via IFTTT